Yuang Sewai: Takuik di Swab | Rori Aroka Roesdji

Siang nan angek-angek tangguang, Yuang Sewai duduak mangalai di bangku dalam lapau Tek Roih. Ndak lamo tibo Labiah jo muko cameh,

“Manga ang ko Labiah?” asok rokok batali-tali mambubuang ka langik.

“cameh den Yuang, den ka naik kapa tabang”

“yo ulok bana ang jadi urang, ka naik kapa tabang cameh lo. Ndak bisa ang jadi urang kayo ko doh” muncuang Yuang Sewai galak tasunggiang, mungkin inyo mancumeeh Labiah.

“Aden cameh bukan naik kapa tabangnyo Yuang, tapi swab sabalun barangkek tu. Ndak talok den rasonyo doh.”

“ondeh, kok barangkek jo pitih suap ang yo parah tu. Baurusan jo polisi ang beko Labiah.”

Mandanga Yuang Sewai sarupo itu tasambua galak Labiah, sambia manggeleng-geleng kapalo Labiah manarangan kalau swab tu beda jo suap. Bagulambek Labiah manarangan caro karajo swab tu, jauah babeda jo suap.

“Masalahnyo itu Yuang, awak kanai cucuak. Tapi awak lo nan mambayia.” Gaya ngecek Labaih lah mulai serius. Labaiah mampakaroan mambayia maha untuk hasil swab tu, alun lo ongkoih kapa tabang nan ka di bayia lai.

Mandanga labiah mangecek sarupo itu, manakua Yuang Sewai saroman urang bapikia. Samakin kuek bapikia, samakin ngari dalam pangana Yuang Sewai. Tabayang pancucuak masuak ka dalam iduang, manggaletek kuduaknyo dek mamikian tu.

“Ndak itu do Labiah, ang usulan beko ka urang tu. Ndak bisa aia salemo ang se nan di agiah ka urang tu, kan samo dalam iduang asanyo mah.”

Tagalak ketek Labiah mandanga saran dari Yuang Sewai, nyo takuik ma matahan kecek Yuang Sewai. Takuik beko marabo pulo nyo. Nyo angguak an sajo saran Yuang Sewai tu.

“Beko den cubo Yuang, ma tau petugasnyo beko induak bako den bagai.” Labiah bajalan ka lua sambia galak-galak surang, maninggan Yuang sewai nan mulai angek dek kanai patahan keceknyo.

“Ang tu salah e, den agiah saran ang cumeeh an dek. Dima lo ka mungkin induak bako ang jadi petugas swab ko, induak bako ang se ka ladang karaho sado e nyoh. Kadang antahlah, kalau bacarito jo paja ko. Naik taruih gulo wak dek nyo.”

Baitulah Yuang Sewai, acok ma agiah saran ka urang lain. Tapi banyak nan ndak baguno, asa ka malantuang juo muncuangnyo tu.

About
Latest Posts

ikuti saya

Rori Roesdji

Redaksi Marewai at Media

Pengelola dan pengisi tetap rubrik "Carito" Yuang Sewai berisikan carito/cerita lucu berbahasa Minang yang diisi sebagai garah lapau, untuak gurau parintang risau.

ikuti saya