Sakiro Abih Ashar nampak Labiah bajalan tagageh ka lapau Tek Roih, inyo lansuang ma ambiak goreng pisang angek. Sakali gigik lansuang tasambuah goreng pisang kalua baliak. Mancaliak Labiah bantuak itu lansuang disapo Yuang Sewai,
“Manga ang ko Labiah, bantuak urang tasapo hantu ang mpak dek den mah, basasak jalan, basasak lo makan. Lai aman ang koh?”
Mandanga kecek Yuang Sewai, lansung marabo se Labiah. nyo sabuik sedang paneh, utak e sadang ndak lamak.
“Lah tigo kali den saminggu ko pulang baliak ka poli, tapi ndak ado hasilnyo?”
“Sajak bilo lo ang main voli Labiah?” Yuang Sewai takikiak, nyo sangko Labiah bagarah. karano salamo ko ndak pernah mandanga Labiah Main voli.
“Ndeh, Yuang Sewai yo. Poli bukan voli. ang bedaan lah ma nan pakai P jo pakai V. lah samo ang jo urang Batak mpak dek den mah.”
“Poli ko apo lo tu?”
“Poliklinik, ka uma sakik. ndak lapangan doh.” makin naik hao Labiah mangecek, harok pai ka kadai mananangan masalah. Kiro e dapek masalah baru lo dek bacarito ka urang nan ele.
“Sakik a ang labiah? dek ka poliklinik lo masuak ang, babahayo bantuak e mah. ka di operasi?”
“Ndak sado ka poliklinik tu ka operasi doh Yuang, adek ka pai kontrol ka dokter spesialis.”
“Oh, pai kontrol.” Yuang Sewai ma angguak-angguak balam, bantuak urang nan paham bana lo.
Mancaliak Yuang Sewai bantuak itu, tambah paneh hati Labiah. Inyo katai-katai Yuang Sewai, keceknyo Yuang Sewai sok paham, sok ngarati, sok Yes bagai.
“Lah tigo kali den tibo ka poliklinik, kecek e kuota panuah taruih. ntah samo jo kartu handphone Rumah sakik tu kini. pakai Kuota bagai, ntah lah bantuak internet urang barubek tu kni agak e.”
“Tu ba a caro lai, pasti ado lo caro e. dek ang ndak amuah batanyo mah. Ang tanyo bagai lah Labiah.”
“Tadi lah den tanyo, keceknyo ko aturan BPJS. kalau masuak umum bisa lansuang dapek masuak.”
“Oh, jadi ado lo panyakik ko nan umum bagai yoh?”
“Ndeh, ba a lah den caro mangecek an ka talingo pakak ang tu Yuang. Talingo Pakak, Utak pakak lo. bantuak a lah tuhan mambuek ang dulu koh?”
“Ndeh, agak kasa muncuang mah Labiah. tu mako e ndak amuah urang poli tu ma agiah ang masuak mah. ndak ado saba stek alah juo, lansuang naik darah se.”
Mandanga Yuang Sewai mangecek sarupo itu, Labiah mangecek maleh mambahas se lai. padohal dalam pangana tadi datang ka kadai Tek Roih ko bia dapek mambantu inyo manyalasaian masalahnyo. Dek inyo ndak mangarati pakai aplikasi JKN Mobile dari BPJS koh. Tapi kironyo bacarito ka urang nan ndak tahu lo, ka urang nan sakik sajak lamo. Tapi ndak barubek ka dokter. Labiah nonoh kopi nan tingga di meja, bayia utang ka Tek Roih. Lansuang bagageh nyo kalua kadai.
Mancaliak Yuang Sewai ka Tek Roih,
“Apo salah den Tek?” sambia manggaruik kapalo. Tek Roih indak manjawek, nyo agiah Yuang Sewai senyum sajo.
Silakan kirim karyamu ke; [email protected]
Discussion about this post