Ndak alang sanang hati Yuang Sewai, lah tibo badan di Tanah Jawa. Dapek jatah liburan perai dari Mak Itam, dek paruik taguncang-guncang dalam kapa tabang, lah taraso litak paruik.
“Ndak lapa paruik ang rasonyo, Labiah?” Sambia bakacak pinggang Yuang Sewai di parkiran. Labiah ma angguak-angguak sajo, dek inyo maraso Masih paniang. Raso masih di ateh kapa tabang juo baru.
“Ba a dek anok sajo waang koh, mabuak ang dalam kapa tabang cako?” Galak takakeh Yuang Sewai. Di irik e tangan Labiah bajalan manjauh dari parkiran, dek Yuang Sewai maraso lamo mananti Mak Itam manjapuik. Bajalan jauah urang tu baduo sahinggo basobok Rumah Makan Padang mereknyo, basigageh Yuang Sewai mairik Labiah masuak ka dalam rumah makan tu.
Sadang manunggu nasi tibo, babunyi hape Labiah. Tatulih namo Mak Itam sadang mamanggia,
“lah dima kalian, Mamak lah tibo di parkiran a.”
“Eh, kami sadang makan sabanta, Mak. Tunggu sabanta lu, Yuang Sewai paruik e karoncongan dek naiak kapa tabang.” Jawek Labiah sambia galak-galak tanguang.
“Ndeh, makan lo kalian lu. Makan a tuh? Bia Mamak turuik ka situ”
“Di Rumah Makan Padang ko Mak a, dakek parkiran ko juo nyoh”
“Lai balisensi tampek rumah makan padang Nan kalian masuak an tu?” Mandanga Mak Itam manyabuik itu di ambiak dek Yuang Sewai hanphone Labiah,
“Lisensi kami di lidah latak e mah, kalau lamak di santuang. Tapi kini yo sadang litak bana ko ah, lamak ndak lamak disantuang se lai.”
Sasudah mangecek itu mancaliak Yuang Sewai ka pagawai rumah makan tuh, ndak ado respon urang tu. Yuang Sewai takuik kok ka mangarati lo urang rumah makan tu Jo bahaso minang, kironyo Lai indak doh. Kalua lah cumeeh Yuang Sewai, mangecek makan kaliao Nan banamo randang lah, sampai ka makan sayua cubadak keceknyo.
Labiah mamanjangan muncuang nyoh ka Yuang Sewai, mangode supayo Yuang Sewai Jan kareh-kareh bana. Tapi dek Yuang Sewai nyoh picayo kalau Nan manggaleh ndak Urang Awak, karano raso ndak bisa baduto. Sasudah mamutuih talepon Mak Itam, Yuang Sewai bagageh ka kasir mambayia makannyo baduo Jo Labiah.
Sampai di lua rumah makan Yuang Sewai manggarutuak juo baru,
“Kok ndak dek lapa, ndak ka den makan bagai nasi tu tadi doh”
Mandanga itu Labiah galak-galak ketek se, ndak marespon kecek Yuang Sewai. Ndak jauah dari situ basobok lah Jo Mak Itam nan sadang mancari urang baduto koh. Lah basobok Jo Mak Itam tambah banyak Nan dikarutok i dek Yuang Sewai koh.
“Ang sangko sado Nan bamerek rumah makan padang di Jakarta ko samo Jo makan di kampuang Awak Yuang? Rumah Makan Padang di Jakarta ko banyak Nan hanyo manumpang merek, tu mako den tanyo tadi. Lai masuak ka rumah makan padang balisensi kalian?”
“Lisensi ko apo kini caro Awak nyoh ko, Mak? Ndak paham den doh. Nan den tau lisensi ko izin merek atau pajak untuak merek. Sia lo Nan mangaluan Lisensi untuak rumah makan padang ko?hebat bana urang tu tuh?”
“Ha, kan itu lah Yuang. Lisensi ko di buek untuak manjago kualitas masakan di rumah makan padang. Dek banyak nan bukan urang Padang manggaleh masakan Padang, pokok e intinyo untuak manjago kualitas, raso masakan.”
“Ndeh, ndak paham den tu doh, Mak. Banyak bana aturan-aturan nan ba buek-buek mpak dek den, bia se lah urang tu manggaleh nasi Padang. Mereka kan manggaleh mereknyo, ndak manggaleh raso bagai doh. Karano lidah urang ndak bisa di ota doh, apo Lai lidah Urang Awak.”
Galak – galak Labiah mancaliak Mak Itam Tagagok manjawek tanyo-tanyo bongak dari Yuang Sewai. Dek Labiah, Yuang Sewai bukan urang bongak, tapi kejujuran dalam pikirannyo masih tajago bana. Inyo akan manyabuik apo nan taraso, ndak kan ado takuiknyo kalau itu ka manyingguang urang lain. Kalau dek Labiah ado batua nyo juo apo nan di sabuik dek Yuang Sewai, tapi Mak Itam ndak lo salah doh. Tapi itu lah, banyak karajo ndak baguno nan di buek serius dek urang di duniako. Tamasuak mambuek lisensi Rumah Makan Padang ko, tapi ba a lah. Awak nan masyarakaik badarai koh ndak ka bisa gai manga-manga doh, tapaso mangikuik ka karajo urang nan bapitih.
Dalam oto Mak Itam Masih basikareh manarangan ka Yuang Sewai satantang paralunyo lisensi Rumah Makan Padang koh, tapi dek Labiah ndak basalero mandanga perdebatan urang tu, di bae nyo lalok dalam oto Mak Itam nan bakarusi ampuak tuh.
Rori Aroka Rusji, Pengelola dan pengisi tetap rubrik “Carito” Yuang Sewai berisikan carito/cerita lucu berbahasa Minang yang diisi sebagai garah lapau, untuak gurau parintang risau. Sekarang berkegiatan di Marewai N’Co sebagai Sutradara dibeberapa film yang sudah ditayangkan di Marewai TV. Marewai N’Co merupakan kanal lain dari Komunitas Serikat Budaya Marewai.
Silakan kirim karyamu ke; [email protected]
- BUKA TAHUN 2026, BAND STEVUNK DARI PADANG RILIS DUA LAGU BERNUANSA PROTES! - 23 Januari 2026
- PELESIRAN – Sebuah Catatan: Setelah UWRF, Apalagi yang Kau Cari? | Hasbunallah Haris - 10 Januari 2026
- Resensi: Antara Kota dan Kampung, Pecundang di Negeri Orang, dan Narator yang Berpetuah | Dandri Hendika - 8 Januari 2026
Discussion about this post