Yuang Sewai: Biliak Suaro | Rori Aroka Roesdji

Sadang talamak mancukia-cukia cirik iduang, tibo Mak Itam manyapo Yuang Sewai.

“A nan bacukia tu yuang? Lai pai mamiliah ang tadi?” sambia manokok an cincin batu akiak ka meja lapau.

“Apo juo nan ka dipiliah lai, Mak?” Jari kalingkiang Yuang Sewai sadang talamak dalam iduang.

“Ndak dapek surek panggilang ang ka TPS doh yuang? Lai lah ba KTP ang koh?”

“TPS ko apo lo kini ko, Mak. Tampek Pambuangan Sampah?” Yuang Sewai sadang talamak bana mancukia iduangnyo.

Mandanga sarupo itu tagalak Mak Itam, inyo tau bana Yuang Sewai ko suko bagarah saroman tu. Manggeleng-gelang Mak Itam sambia bapikia, kato-kato nan pas untuk batanyo ka Yuang Sewai.

“Sabananyo lah Yuang, Lai pai mamiliah ang tadi? Bia lamak lo ota kito di lapau ko!”

Dek mancaliak Mak Itam lah mulai serius, di cabuik dek Yuang Sewai kalingkiang dari dalam lubang iduangnyo, bakisa duduak ma angkek kaki sabalah ka ateh kurisi.

“Nyo mode ko mah, Mak, aden agak trauma jo biliak suaro ko.”

“Trauma dek apo lo ang koh?”

Mancaliak Mak Itam penasaran, di batuak-batuak an dek Yuang Sewai muncuangnyo. Bantuak urang nan ka serius bana lo mambahas biliak suaro ko.

“Dulu, den pernah masuak ka dalam biliak nan basuaro ko. Di pasa malam dulu, merek tampek e rumah hantu. Ampia tapanca kajamban den dek takuik, Mak, makonyo trauma den masuak biliak basuaro ko. Kapatang pas urang ma agia surek untuk ikuik ka TPS tu den tanyo, apokah ndak buliah mamiliah tu di meja panitia sajo. Jawek urang tu di aturannyo harus masuak biliak suaro. Mandanga sarupo itu, den agiahan se surek panggilan mamiliah tu ka urang tu baliak, den sabuik den ndak kan mamiliah kalau harus masuak biliak basuaro tu.”

Mandanga kato sarupo itu, tagalak Tek Roih nan sadang manggoreng tahu. Manyalonyo di tangah Yuang Sewai jo Mak Itam nan sadang binguang.

“Mak Itam tanyo juo kamanakan nan dalang tu, nyo asa kamalantuang se muncuang buruaknyo tu mah.”

Yuang Sewai lansuang naik spaningnyo mandanga Tek Roih manyabuiknyo dalang, baturo-turo Yuang Sewai di lapau. Inyo ndak manarimo kalau disabuik dalang.

Baitulah Yuang Sewai, menyangko biliak suaro samo jo biliak basuaro.