Hari nan lah labiah tangah hari, nampak Yuang Sewai bajalan masuak ka laman rumah. Yuang Sewai baru pulang dari sumbayang jumaik, kain saruang lah tasandang di kuduaknyo. Bininyo sadang duduak mangalai di bawah batang mangga, nampak buyuang pulang batarompa segeh.
“Bali tarompa baru uda, nyo mangecek ndak bapitih tapi tarompa baru tabali juo, ” sapo bini nyo ka Yuang Sewai. Mandanga sarupo itu bagageh Yuang Sewai duduak sabalah bininyo.
“Iko sebagian praktek dari kaji nan uda danga di musajik tadi diak, bunyi kajinyo ‘ambiak nan elok, tinggaan nan buruak’. Lansuang uda amalkan sakali, uda tinggaan tarompa buruak uda di musajik. Uda ambiak tarompa nan labiah elok nan ka di pakai pulang.”
Mandanga sarupo itu, mamerah muko bininyo.
“Astagfirullah, uda. Itu makonyo sikolah disuruah urang, bia bajalan kincia-kincia tu,” kecek bininyo mahariak Yuang Sewai. Bininyo manggeleng-geleng sambia manyuruah Yuang Sewai baliak ka musajik untuk mangganti tarompa tu baliak. Lah sudah lo Yuang Sewai kanai ceramah dek bininyo di rumah. Basigageh Yuang Sewai baliak ka musajik ma antaan tarompa barasiah untuk ka ambiak wudhu jama’ah musajik.
Baliak dari musajik duduak Yuang Sewai baliak dakek bininyo, mancaliak an tarompa japang buruak di kakinyo, batanyo bininyo satantang isi katubah khatib dimusajik sabanta ko. manjawek Yuang sewai jo sumangaik.
“Tadi kecek pak khatib tu, urang kilaki buliah babini labiah dari ciek.”
“Tapi ado saraiknyo kan da, kecek khatib tu?”
“Itulah, uda ndak mandanga bana tadi saraiknyo lai. Lah lalok-lalok ayam uda tadi katiko khatib mangecek an sarat-saratnyo, ” jawek Yuang Sewai bantuak urang nan ndak basalah. Mandanga itu, tabik rabo bininyo.
“Laki dalang, tibo nan lamak-lamak sajo inyo dangaan. Tibo tangguang jawab jo sarat nyo lengah, bamacam alasan, lalok lah, maota jo urang lah, babagai alasannyo. Kok ka babini uda ciek lai babini lah, sia lo ka manarimo buyuang Sewai nan kincia-kincia acok tasandek ko.”
Mancaliak bini lah marabo, bajalan bantuak urang pakak Yuang Sewai ka dalam rumah. Indak ka salasai-salasai kalau badebat jo induak bareh ko doh, baitu pikianyo. Yuang Sewai bagageh ka dapua mambuek kopi, bantuaknyo sagaleh kopi paik bisa mailangan iduik nan lah paik ko. Baitu pikia Yuang Sewai.
- AYIA ANGEK : WISATA SEHAT NAGARI MUARO PAITI - 30 Maret 2021
- Nagari Sungai Pinang : Bermalam Di Eroang Gadang, Menikmati Dentuman Batu Dandang - 24 Februari 2021
- Yuang Sewai: Takuik di Swab | Rori Aroka Roesdji - 13 Januari 2021
Discussion about this post