Carito: Yuang Sewai – Raun Panik | Rori Aroka Rusji

Hari nan ditunggu Yuang Sewai lah tibo, sasuai jo janjinyo Mak Itam tibo manjapuik Yuang Sewai ka lapau Tek Roih. Nampak gaya buyuang lah segeh bana, kameja babukak buah tigo di ateh, sarawa lepis nan jajak lipeknyo alun ilang, tasangkuik kaco mato itam ciek di buah bajunyo.

“Pokoknyo beko Yuang, sapanjang jalan ang tiru sajo apo nan den karajoan. Bia ndak banyak tanyo.” Bakato Mak Itam sambia manyetir oto. Sapanjang jalan nampak Yuang Sewai sumangek bana sambia mamacik asoi di tangan, disuruah Mak itam untuk jago-jago kok mabuak Yuang Sewai di jalan.

Lah saparoh jalan nampak Yuang Sewai mamacik paruik, mungkin manahan Lapa. Yuang Sewai ndak talok mangecekan ka Mak Itam, dek peraturan awal tadi. Inyo harus manuruik apo nan di karajoan dek Mak itam. Dek mancaliak Yuang Sewai sarupo itu, manapi Mak itam ka parkir Rumah Makan di daerah Lubuak Bangku.

“Jauah Pakanbaru lai ko, Mak?”

“Jauah lai Yuang, Makan lah wak dulu. Pokoknyo beko di dalam, ang tiru sajo apo nan den karajoan”

Mandanga Mak Itam mangecek itu, Yuang Sewai maangguak sajo. Tibo di dalam duduaknyo di muko Mak itam, sabalun mulai makan Mak Itam nio pai ka balakang dulu buang aia. Mak Itam mangecek an ka Yuang Sewai, ndak usah maikuik ka balakang, manyuruah Yuang Sewai manunggu sajo di meja nan lah tahidang makan tadi.

Ndak lamo kabalakang, tibo Mak Itam. Nampak Muko Yuang sewai lah cegeh sajo.

“Lah mulai ang makan Yuang? Dek lah tagok muko ang baliak bantuaknyo”

“Alun mak, tadi dek Auih bana. Den minum sajo aia dalam boto Bir tu dulu, Galeh untuk minum alun juo tibo lai.”

Mandanga Yuang Sewai, tasambua galak Mak Itam, inyo dek tau kalau aia dalam boto bir tu isinyo untuak ka basuah tangan. Tapi Mak Itam ndak namuah manyabuik an ka Yuang Sewai, takuik beko tasingguang. Kok marabonyo di Rumah Makan ko, malu Mak Itam jo urang banyak.

Sasudah makan kanyang bajalan Mak Itam jo Yuang Sewai kameja kasir, mambayia utang nan lah tamakan. Bajalan oto manuju Pakanbaru, satibo di Kelok Sambilan Yuang Sewai mintak Mak Itam malambek an jalan oto.

“Sapanjang perjalanan dari Padang tadi apo nan lai berkesan atau nan babakeh dek ang Yuang?” Tanyo mak itam mamulai bukak carito.

“Ado ciek Mak, Nan wak ambiak perai di meja kasir rumah makan tadi tu ah. Alun juo abih dek den lai, tingga juo saketek lai koah. ” kecek Yuang Sewai sambia mancaliak an penculiak gigi nan tingga saketek lai.

Mancaliak itu, Gambuang pipi Mak Itam dek manahan galak. Dek ndak nio basiarak jo Yuang Sewai dalam oto, Mak Itam ma iyoan sajo karajo Yuang Sewai nan mamakan panculiak gigi.

“Abihan bana lah, kok iyo itu nan paliang berkesan dek ang salamo perjalanan wak ko.”

Mak Itam mamaliangan muko mancaliak ka labuah gadang, maraso basalah ma ambiak panculiak gigi di rumah makan tadi. Mungkin Yuang Sewai manyangko Mak Itam mamakan abih panculiak gigi tu, ndak nampak deknyo bakeh panculiak gigi tu dibuang sabalun naik oto tadi. Baitulah Yuang Sewai nan luruih tabuang, mungkinnyo ndak tau kalau panculiak gigi tu di buek dari batuang nan baparuik aliuh. Untuak mancukia samba dagiang nan tasalek di salo gigi.