Carito: Yuang Sewai - Panaiak Gulo | Rori Aroka Rusji

Sasudah mandanga kaba di lapau tek Roih, Yuang sewai basagiro ka Kantua Nagari. Baniek ka ma isi formulir untuk bantuan nan ka tibo. Jalannyo basicapek, takuik beko kahabisan tampek. Tibo di muko Kantua Nagari nampak urang sarami antah, manyalek buyuang Sewai di salo-salo urang nan bagadincik pincik. Tangan Yuang Sewai manjulua disalo ketiak urang banyak, diirik karateh salai nan ta onggok di ateh meja. Sasudah mendapek karateh formulir, basigageh Yuang Sewai mendakek ka tampek pak jorong nan sadang duduak babarih di meja masiang-masiang.

“Eh, Buyuang. Lai nio juo ma ambiak bantuan pamerintah ko yoh.” kecek Pak Jorong satangah manyindia.

Yuang Sewai ndak manjawek, inyo manakua sajo menulih formulir nan lah di ambiak tadi. Lah baisi satangah karateh tu, mangarinyuik kaniang Yuang sewai.

“Iko pekerjaan urang tuo ko apo ka di tandoi ko Pak Jorong, ndak ado karajo gaek wak nan tatulih dikarateh ko doh.”

“karajo gaek ang apo Yuang?”

“Karajo gaek den mamakiah dipasa, ndak ado dalam iko doh. Nan ado PNS, Tani, TNI POLRI, Wiraswasta sudah tu dan lain-lain.”

“Ang isi se di kotak dan lain-lain tu.”

“Eh, jan sumbarang se Pak Jorong. Ndak karajo nan lain-lain bagai gaek den doh. Nyo mamakiah elok–elok ka urangnyo, jan salah lo Pak Jorong lai.”

Mandanga sarupo itu, naiak gulo Yuang sewai, manuduah Pak Jorong mamburuak-buruak an karajo gaeknyo.

“Ndak itu mukasuiknyo doh Yuang.”

“Jan banyak juo kecek Apak lai. Kok ndak buliah den mandapek bantuanko sabuik se lah,” sambia ma ampeh pena ka ateh meja.

“Ayah den lo nyo pakecek an karajo lain-lain, sumbarang tuduah sajo paja ko, ndak dapek bantuan ndak anti. Sungkahan lah pitih tu surang.” Kutuak Yuang Sewai sambia bajalan kalua Kantua Nagari, baraso angek talingonyo mandanga Pak Jorong manuduah sarupo itu. Baitulah Yuang Sewai nan capek naiak gulo nyo, ndak bisa mambantah jo kato elok. Acok managang kalau ditagah.

About
Latest Posts

ikuti saya

Rori Roesdji

Redaksi Marewai at Media

Pengelola dan pengisi tetap rubrik "Carito" Yuang Sewai berisikan carito/cerita lucu berbahasa Minang yang diisi sebagai garah lapau, untuak gurau parintang risau.

ikuti saya