Ntah apo nan masuak ka diri Yuang sewai pagi ko, agak takajuik bininyo mancaliak Yuang Sewai jago pagi. Sadang duduak-duak di lapiak pandan dakek dapua, Yuang Sewai nampak mancaliak jauah ka lua rumah. Mancaliak sarupo itu, managua bininyo bagulambek,
“Manga uda jago pagi ko ? apo nan tajadi bakeh diri uda. Maranuang dakek daun pintu dapua tu.”
“Ndak ado doh diak, mungkin badan den sadang elok loh kini mah.”
Kaniang bini Yuang Sewai nampak mangarinyuik dek manahan bareknyo embe barisi kain sudah basasah, mancaliak sarupo itu tibo ibo dalam diri Yuang Sewai,
“Paralu den bantu diak?”
“Ndak usah lah, iko lah karajo den mah, Da. Kok ka manalong juo uda, tolongan mambarasian lobak untuak ka digulai beko. Bia ndak lamo lo uda manahan lapa”
Mandanga itu, Yang Sewai lansuang bakaja ka dakek lobak nan lah talatak dalam cambuang dakek lamari dapua. Dikakok lobak bulek gadang, buyuang mamuta-muta lobak du di ateh tangannyo. Manyigi bidang nan ma nan di buka daulu, tangannyo basigageh mangalupehan sahalai-sahalai daun lobak tu. Tapi lah banyak daun tabukak, ndak ado basobok apo-apo, nyo bukak lo lobak nan baru.
“Alah sudah uda?” tanyo bininyo, tapi tibo heran bakeh bininyo. Dek ndak ado mancaliak lobak nan nyo bali dari pasa subuah tadi.
“Ndak ado nan rancak lobak kau bali tu doh diak, ndak ado nan barisi doh” kecek Yuang Sewai bantuak urang nan ndak basalah.
“Ma nyo kulik lobak tu?” tanyo bininyo lah agak berang.
“Lah sudah den campak an ka lua tu a, ntuak a guno nyo tuh. Mambali lobak nan ndak barisi.” Yuang Sewai ndak ado takajuik saketek juo doh, dek inyo maraso ndak ado nan salah dari karajonyo.
“Ampun den Tuhan, Dek apo lah laki den ko kini koh. Ba a caro mampaelok an isi dalam kapalo nyo ko,” sambia manunjuak kaniang Yuang Sewai.
Mandanga bini nyo mangecek sarupo itu, basagiro Yuang Sewai bajalan ka lua rumah sambia mangutuak dalam hati.
“Awak lo nan nyo salahan, lah jaleh inyo nan salah. Mambali lobak nan ndak barisi, awak lo nan nyo berangan.”
Baitu lah Yuang Sewai, manyangko lobak nan dijua di pasa tu ado isinyo. Dek maleh basitangka jo bini pai banatanang Yuang Sewai ka balai-balai di bawah batang mangga dilaman rumahnyo.
- Carito Yuang Sewai: BADUTO KA BADAN SURANG, BADOSO TU? - 25 September 2024
- Carito Yuang Sewai: Tatolong Dek Jangguik - 8 September 2024
- Jurnalis Reformis; Pelayan Tuhan Tidak Pernah Arogan | Rori Aroka Rusji - 2 September 2024
Discussion about this post