Sajak pandemi korona manjadi buah bibia urang sanagari, terkenal pulo panyakik tu kini. Ota-ota urang nan sadang duduk di lapau Tek Roih siang ko lah sampai lo ka topik panyakik nan sadang terkenal tu.
“Adolo lamak e musim pilkada korona ko ndak, Mak. banyak sajo bantuan nan tibo,” kecek Labiah mamulai carito sambia mangulek goreng pisang.
“Pilkada ko apolo koh? Ubek kada?” salo Yuang sewai. Mandanga kato sarupo itu tasambua galak urang saisi Lapau Tek Roih.
“Ba a kok pakak bana ang ko Yuang, pilkada tu singkatan Pemilihan Kapalo Daerah. Urang ka mamiliah walikota, Bupati samo Gubernur bagai.” jawek Tek Roih mahariak Yuang Sewai. Muko Tek Roih nampak galak-galak cumeeh, samantaro Yuang Sewai manggaruik-garuik kapalo bantuak urang binguang.
“Nan paralu kan lai rato pambagian nan tibo mah, apo juo nan ka di upek an lai,” baitu jawek Mak Itam mananangan urang saisi kadai. Yuang Sewai nampak ma angguak-angguak mandanga Mak Itam. Dek mancaliak Yuang sewai baangguak sarupo itu, Mak Itam maminta pandapek Yuang Sewai satantang nagari kini di maso pandemi korona ko.
“Kalau dek den mak, Samakin banyak bantuan korona ko samakin kuek hati den ka mamiliahnyo di pamilihan kapalo daerah bisuak ko mak. Nomor uruik bara liau tu, Mak? Rancak inyo bupati kito lai, bia banyak bantuan untuk urang bansaik sarupo kito-kito ko.”
Mandanga jawek Yuang Sewai sarupo itu, tasambua gadang galak Mak Itam. Tek Roih lansung manggaruik kapalo sambia bajalan ka balakang. Mungkin lah amba pangananyo mancaliak Yuang Sewai ko.
“Ba a dek Mak Itam tuh?” tanyo Yuang Sewai serius, agaknyo Yuang Sewai lah maraso dibaok ikuik sato maota siang ko.
“Tasarah dek ang lah Yuang, kok ka ang piliah korona tu piliah lah. Den ndak ka managah ang doh, kok kini yo rancak den baliak ka kantuo bakarajo lai. Dari pado maota ndak jaleh sarupo iko.” Mak Itam bagageh malatak an pitih di ateh meja kasir Tek Roih, inyo lansuang bajalan kalua maninggaan lapau Tek Roih.
Mandanga jawek Mak Itam sarupo itu tambah binguang pangana Yuang sewai, nyo mancaliak ka Labiah nan sadang lamak mangulek goreng.
“Salah kecek den sabanta ko Labiah?”
“Ang ndak salah bagai doh Yuang, yang salah tu korona tadi. Manganyo mancalon pulo, lah jaleh Mak Itam tadi tim sukses Calon Bupati nomor duo. Ang sabuik lo ang ka mamiliah korona.”
Labiah bagalak-galak baduo Jo Tek Roih, mancaliak Yuang Sewai nan paniang lalek mamikian kato-katonyo. Sasudah mambayia balanjo, Labiah lansuang pai maninggan Lapau Tek roih.
“Bisuak-bisuak banyak ang mambaco yo Yuang, bia ndak ele bana ang jadi urang.” Tek roih mahariak dari balakang, tapi dek Yuang Sewai pantang bana disabuik ele. Tabik rabonyo di lapau Tek Roih.
“Mujua lah abih bakirok urang-urang nan sok cadiak tu, batambah paniang den maota jo urang-urang sarupo itu. Lain kecek wak, lain lo jawek dek inyo. Inyo mananyo pandapek, wak jawek elok-elok nyo bae lo galak. Kadang ntah ma nan ele wak nyoh. Kok nyo kecek an den salah kan jaleh pulo, ko indak nyo adu jo galak se awak.” Muko Yuang Sewai mamerah. Mungkin dek manahan binguang pangana tadi, barubah jadi rabo. Mancaliak Yuang Sewai sarupo itu, Tek Roih hanyo manggeleng sajo dek ndak sakali duo kali mancaliak Yuang Sewai marabo ndak manantu sarupo itu. Sabalun manaruih an karajo ka balakang, Tek roih mancaliak Yuang Sewai tasanda jo pangana binguangnyo ka tunggak Lapau tek Roih.
- Carito Yuang Sewai: BADUTO KA BADAN SURANG, BADOSO TU? - 25 September 2024
- Carito Yuang Sewai: Tatolong Dek Jangguik - 8 September 2024
- Jurnalis Reformis; Pelayan Tuhan Tidak Pernah Arogan | Rori Aroka Rusji - 2 September 2024
Discussion about this post