Sabalun urang kantua istirahaik siang, Yuang Sewai datang maongkok-ongkok bajalan masuak ka dalam kantua Bank, kalau dek Yuang Sewai namonyo Lumbuang. Di pintu masuak basobok buyuang jo satpam,
“Selamat siang, pak. Ada yang bisa kami bantu,” kecek satpam basilunak.
“Manga lo Selamat ka ang bantu, namo den Buyuang Sewai. Aden nio manabuang harato den di siko,” jawek Yuang Sewai serengeh.
“Lah ado apak punyo buku rekening?”
“Ma pulo ado rekening ba buku dek ang, rekening listrik lai ado a,” tambah sarengeh jawek Yuang Sewai. Dek mancaliak sarupo itu, basagiro satpam manyuruah Yuang Sewai ka costumer service nan sadang kosong. Duduaknyo tapek di muko gadih manih nan baguteh hari tu, mato Yuang Sewai baputa-puta mancaliak sakuliliang ruangan kantua.
“Ada yang bisa kami bantu, pak?”
“Den nio manabuang harato den di siko!”
“Maaf pak, sebelumnya bapak sudah punya buku tabungan?” jawek gadih nan manih tadi jo senyum nan manih pulo.
“Jan mintak maaf lo, adiak ndak salah bagai doh. Den nio manabuangan bareh den nan baru sudah batumbuak di heler, juo ado kabau limo ikua. Di siko kan lai bisa manyimpan harato mah.”
“Maaf bapak, di sini tempat menabung uang. Kalau bapak ingin menabung di sini silakan jual dulu harta bapak ke pegadaian.”
“Eh, ba a lo tuh. Itu kan harato juo, harato pusako turun tamurun mah. Ndak lo bisa ditabuang doh. Tampek manabuang a lo namonyo koh!”
“Maaf Pak, di sini hanya menerima tabungan berupa uang atau emas juga bisa.”
“Ondeh piak, basuruah lo den manggadai. Aden ndak bangkrut doh, den nio manabuang an harato. Manggadai tu untuak urang nan sulik iduik. Kok sulik iduik manga lo den ka siko, jadi ndak bisa manabuang harato den siko doh?”
“Sekali lagi maaf pak, untuk sekarang belum bisa menabung beras dan kerbau di Bank ini.”
Mandanga jawek gadih tu manggarutuak Yuang Sewai, lansuang nyo tagak dan bajalan capek kalua sambia mangecek surang.
“Tampek manabuang a lo namo e koh, ndak bisa manabuang harato siko. Mungkin dek urang di siko harato tu pitih sajo, tanah pusako jo ladang laweh den tu ndak harato deknyo doh.”
Buyuang bajalan sambia manggeleng kapalo, ndak sasuai apo nan inyo caliak jo nan tasarobok. Dek buyuang harato tuh ndak hanyo pitih, tapi nan tasarobok deknyo tanyato harato nan bisa di tabuang tu hanyo pitih.
- Carito Yuang Sewai: BADUTO KA BADAN SURANG, BADOSO TU? - 25 September 2024
- Carito Yuang Sewai: Tatolong Dek Jangguik - 8 September 2024
- Jurnalis Reformis; Pelayan Tuhan Tidak Pernah Arogan | Rori Aroka Rusji - 2 September 2024
Discussion about this post