Kulek goreng pisang Yuang Sewai batambah kancang, mandanga carito Mak Itam. Suaro Mak Itam malatuih-latuih, aia saleronyo tabang hambua. Urek lihia managang, sunguik Mak Itam naik turun. Mak Itam basikareh kalau hasil baituang capek urang-urang survei tu ndak ka jauah babedo jo nan sabananyo. Sambia mambinjek katan bakarambia Yuang Sewai galak tasunggiang, mancaliak Mak Itam manarangan caro baituang urang-urang survei tu.
“Urang tu sikolah di universitas hebat tu Labiah, ndak sumbarang maituang sajonyo tuh.” Baitu ariak Mak Itam ka muko Labiah.
Muko labiah nampak mamerah, tapi rono-rono mukonyo, Labiah masih indak picayo hasil ituang capek urang survei tu batua,
“Ndak ka mungkin dek nan saketek, lah ta ukua pokok nan banyak, Mak.”
“oi, Labiah. Jalan an lah kincia-kincia ang tu saketek, ado rumus nyo tuh. Ndak asa ka mangaluan hasil se urang tu doh.” Lah managang lo Mak Itam baliak.
Mandanga Mak Itam jo Labiah basitegang, maangguak-angguak sajo Yuang Sewai. Sadang bapikia-pikia ka manyalo urang baduo tu.
“Jadi Hasil-hasil ituang capek nan kalua di tipi jo koran tu bisa dipatangguang jawab an tu, Mak,” tanyo Yuang Sewai, bausaho malarai Mak Itam jo Labiah nan sadang basitagang urek mariah.
“Oh, jan ragu lo lai, Yuang. Urang-urang hebat nan baituang tu mah, ado rumus jo metode nan tapek di pakainyo tuh. Ndak pakai kulator Japang atau sempoa se nyo maituang tu doh”
“Dima lo sikolah nyo tu, Mak, lah samo lo jo dukun mpak dek den. Alun sudah urang baituang inyo lah tau lo hasilnyo.” Yuang Sewai mulai sarius.
Macaliak Yuang Sewai lai mulai tapanciang, di puta dek Mak Itam duduaknyo. Mak Itam bacarito panjang proses statistiknyo, dek Mak Itam dulu juo pernah kuliah di jurusan nan sarupo itu.
“Jadi urang hebat tu banyak kalua dari universitas-universitas hebat lo yo, Mak, sarupo Mak Itam ko ah.”
“tantu lah Yuang, itu gunonyo manuntuik ilemu di universitas tu. Bia bajalan kincia-kincia tu, jan pai duduak-duduak se kuliah tu, sarupo Labiah ko ah.”
Mancaliak Yuang Sewai ka bakeh Labiah, nampak muko labiah sirah padam.
“Labiah ko dek kuliah di Sikolah tinggi mungkin mah Mak, makonyo agak lambek manyambuangnyo. Cubo nyo sakolah di Universitas, mungkin hebat lo nyo mah.”
Mandanga sarupo itu, tasambua galak Mak Itam. Kalau lah sarius bana, Yuang Sewai akan taruih mambuek galak urang banyak.
“Sudah basikareh jo urang ndak babana, sudah tu ba iyo lo jo urang dalang. E yayai e.” Mak Itam basigiro mambayia lanjo ka Tek Roih, maninggan Yuang Sewai nan manggaruik kapalo.
Baitulah Yuang Sewai, manyangko Universitas tu babeda jauh jo Sikolah Tinggi. Tatonggok se Labiah sadang manahan sasak angok manahan paneh dek kalah basitagang urek mariah jo Mak Itam.
- Festival Akhir Tahun Steva 2025 : Membaca, Melihat, Merasakan, Mempelajari dan Merayakan - 10 Desember 2025
- Cerpen: Sales Event Organik (E.O) – Rori Aroka - 3 Oktober 2025
- Cerpen | Matinya Tukang Keripik – Rori Aroka - 29 Agustus 2025
Discussion about this post