Sajak malam tadi paruik Yuang Sewai babunyi, dek lupo makan sanjo. Jadi lalok ndak lamak, tiok sabanta tasintak. Tapi ndak ado rasian, di paciknyo paruik dari dalam kamar. Tangah malam buto tadanga suaro aia manitiak di sumua dakek biliak, bagageh Yuang Sewai ka sumua.
“Ntah karajo sia lo ko ndak ma matian kran, malimpah ayia a.” Manggarutok surang Yuang Sewai sambia bajalan baliak ka biliak, mandakek inyo ka bini nan sadang lalok bagaruah. Pikia Yuang Sewai ka manjagoan bininyo untuk mambuek samba saketek, tapi mancaliak bini lalok lamak tibo lo ibonyo. Dipaso juo paruik nan babunyi makin kareh tu lalok.
Lah ampia pagi hari, tasintak lo Yuang Sewai baliak dari laloknyo, tadanga bunyi minyak angek. Pangana Yuang Sewai lansuang ka bini sadang mamasak di dapua, tapi di idu ndak ado babaun goreng doh, ndak lamo datang bininyo ka dalam biliak.
“Agak capek manggoreng kini mah diak, goreng lauak tadi tuh?” sambia pakai senyum bia nampak romantis.
“Lauak apo lo nan ka den goreng parak siang ko da, kan nampak dek uda tadi malam mah. Ndak ado nan ka disamba doh, beko pagi den pai ka pasa lai. Pai manuka.” Mandanga sarupo itu tambah kareh bunyi paruik Yuang Sewai, pikianyo mungkin barasian dek paruik lapa. Tapi ndak juo sanang hatinyo, dek rasonyo ndak rasian bagai mandanga urang manggoreng Lauak sabanta ko doh, nyo tanyo bagulambek ka bininyo.
“Jadi ndak manggoreng lauak adiak tadi doh?” “Indak uda, lauak apo nan ka den goreng.”
“Jadi tadi tu baliak dari ma adiak tu?”
“Tadi den pai buang ayia ketek ka sumua” Mandanga jawek sarupo itu, nyo irik salimuik, sambia bapikia kareh. Mungkin suaro manggoreng tadi tu bunyi buang ayia ketek bininyo. Baitulah lah Yuang Sewai nan ndak kuek manahan lapa, suaro buang ayia ketek bininyo lah tadanga bunyi minyak manggoreng lauk.
- Cerpen: Sales Event Organik (E.O) – Rori Aroka - 3 Oktober 2025
- Cerpen | Matinya Tukang Keripik – Rori Aroka - 29 Agustus 2025
- Carito Yuang Sewai: BADUTO KA BADAN SURANG, BADOSO TU? - 25 September 2024
Discussion about this post