Carito: Yuang Sewai – Bacakak Jo Paruik | Rori Aroka Rusji

Hari nan sadang galok tangguang, sakiro mandakek wakatu mugarik. Panek maota di lapau Tek Roih, Yuang Sewai bajalan jo paruik babunyi pulang ka rumah. Jarak rumah Yuang Sewai jo kadai Tek Roih labiah kurang sakilo bajalan kaki. Bajalan sambia mamacik paruik nan taraso lapa. Saparoh jalan Yuang Sewai tibo di kabun pisang Mak Labiah, dari jauh sayuik–sayuik mato mamandang, nampak dek Yuang Sewai sarupo pisang jatuah dari tandannyo. Tagaletak dakek salo rumpuik jo daun karisiak,

“Kalau den ambiak pisang nan jatuah tu, den raso indak maliang jatuah e doh” bisiak Yuang Sewai ka dirinyo surang.

Pikia Yuang Sewai pisang nan jatuah duo buah tu, cukuik untuk mangganja paruik nan lapa. Bajalan Buyuang bagulambek ka tampek pisang jatuah, matonyo mancaliak suok kida. Takuik beko kok nampak dek urang, cameh kanai sorak urang maliang. Lah ampia dakek ka pisang nan jatuah ka tanah tu, tibo ragu dipangana.

“Iyo lai pisang tu yo, agak lain lo warna e,” Yuang Sewai mangecek surang.

Batangka pikiran Yuang Sewai jo paruik, kok ndak diambiak awak lapa, nio ka ma ambiak tapi ragu. Babaliak Yuang Sewai ka tapi jalan, saparoh jalan pangana Yuang Sewai barubah sakutiko.

“Yakin den, itu pisang mah.” Sambia mambaliak badan.

Bajalan agak capek Yuang Sewai ka pisang nan jatuah tadi. Ndak banyak pikia buyuang lansuang mamunguik capek jo tangan. Sakutiko barubah rono muko Yuang sewai, tapacik barang nan agak lunak. Bagulambek diirik tangan ka iduang, tabaun busuak manyasak iduang.

“Kan iyo cirik, dari tadi den sabuik lai” kecek Yuang Sewai ka badan e surang.

Taraso muncuang ka muntah, bagageh Yuang Sewai manyapu-nyapu tangan ka rumpuik gajah. Buyuang bagageh bajalan pulang, ba arok ndak ado urang nan mancaliak karajonyo. Baitu Yuang sewai nan ndak pandai malawan litak, cirik nampak lah sarupo pisang masak.

Penulis, Rori Aroka Rusji.

• About
• Latest Posts

ikuti saya

Rori Aroka

Redaksi Marewai at Media

Rori Aroka, lahir di Muaro Paiti, Kabupaten Limapuluh Kota, Sumatera Barat. Menulis puisi, cerpen, naskah teater, dan skenario film. Tulisan-tulisannya telah terbit di berbagai media cetak dan online, baik lokal maupun nasional. Buku kumpulan puisi perdananya berjudul Nyanyian Pupang, diterbitkan oleh Purata Utama pada tahun 2021. Kini aktif berkegiatan di Serikat Budaya Marewai dan mengelola situs budaya dan sastra www.marewai.com. Dapat dijumpai di Instagram: @roriaroka, dan Facebook: Rori Aroka Roesdji. Saat ini berdomisili di Kota Padang, Sumatera Barat.

ikuti saya

Latest posts by Rori Aroka (see all)

• Festival Akhir Tahun Steva 2025 : Membaca, Melihat, Merasakan, Mempelajari dan Merayakan - 10 Desember 2025
• Cerpen: Sales Event Organik (E.O) – Rori Aroka - 3 Oktober 2025
• Cerpen | Matinya Tukang Keripik – Rori Aroka - 29 Agustus 2025