Pado babarapo tahun nan lalu, ado duo tetangga nan lah dianggap bantuak kaluarga surang. Tetangga nan awak bahas dalam carito kali ko adolah duo urang padusi baradiak kakak nan lah samo-samo barumah tanggo. Walaupun kami indak badunsanak jo indak ado patalian, tapi hanyo dek manjadi tetangga sajo kami lah maraso labiah pado tetangga jo lah maraso manjadi kaluarga. Kalau ado salah satu dari tetangga kami nan sakik kami langsuang risau jo bagageh mambaok barubek walaupun hari tangah malampun.
Wakatu urang tu baranak ketek, mandeh kami nan mahunian siang jo malam dek lah maanggap bantuak cucu surang, pokoknyo urang tu lah dainggap bantuak anak surang dek mandeh kami, baitu pula kami lah maanggap urang tu manjadi kakak kami. Hari balalu tahunpun baganti kami hiduik rukun jo hiduik ramah tanpa adonyo salisiah paham ataupun masalah nan mambuek kami ranggang. Hinggo tibolah masonyo masalah tibo mauji iman antaro kaluarga kami.
Masalah bamulo katiko uni kanduang ambo mananam bungo diantaro bateh tanah sapadan jo tetangga tadi, indak dek mukasuik lain tapi kakak ambo hanyo suko mananam bungo dan pas bana dihari tu ditanamnyo bungo agak dakek samo tanah sapadan tadi. Manuruik pandangan kami, itu indak ado salahnyo jo indak pulo kami mananam bungo ditanah urang tu kami mananam bungo ditanah bagian kami. Uni ambo mananam bungo di patang hari, dan pagi nyo tibolah maso masalah bamulo.
Kami nan sadang lalok baduo tibo-tibo kami mandanga sayuik-sayuik sampai urang adu muluik. Kami baduo tajago jo takajuik sudah tu langsuang kami mancaliak kabawah rumah. Sampai dibawah kami takajuik mancaliak mandeh kami adu muluik jo tetangga sabalah. Kami indak manyangko tetangga nan salamoko kami anggap lah manjadi kaluarga surang bisa-bisanyo bakato kasa ka mandeh kami.
“Jadi aa maksud ko batanam bungo didakek sapadan?”, sambil tagak pacik pinggang maadok ka mandeh.”
“Yo agiah maaf lu, idak baitu maksud anak kami do”, mandeh mandakek sambia manjalehan.”
“Indak baitu baa, tu manga dakek siko batanam. Nandak maambiak tanah bagian kami?”
“Jan lah kasitu lo pai, indak ka mode itu lo kami do kalian tu lah salah paham mah nak”, Mandeh mangecek jo panuah raso saba jo kelembutan.
Urang tu Indak manarimo kato urang, langsuang mangareh, “Ndehh yo dak sangko kami, bantuak se nan eloknyo kiro diam-diam nio ambiak harato urang”.
Mandanga kecek nan bak kian, angkek suaro lah uni ambo mambela Mandeh, “Oii manga kalian berang-berang ka mandeh den, nan mananam bungo tu den indak mandeh den do.”
Bamulo dari situ, banyak kecek nan kalua. Banyak hal nan indak kami sangko talompek disabuiknyo, nan salamoko nampak elok sajo kini lah kalua sifat aslinyo. Dari kajadian itu, hubuangan kami mulai ratak, indak basapo lai jo indak mode dulu nan satiok hari urang tu pasti main ka rumah. Raso agak lain pasti ado, dek karano salamo ko kami bahubuangan elok lah bantuak keluarga surang tapi kini tibo-tibo se indak basapo lai dek karano masalah nan indak sabarapo dan bisa lo disabuik hanyo salah paham sajo.
Hari samakin balalu, nan kami indak juo saliang basapo. Biasonyo bilo hari ka rayo, kami taruih mambuek kue basamo-samo, mambuek randang basamo, pai barayo basamo. Hinggo sampai suatu katiko uni ambo maambiak buah jariang nan ado di dakek pabatasan tanah sapadan, tajadilah parang muluik nan mambuek hubuangan antaro kami indak elok lai sampai kini. Urang tu mangiro batang jariang tadi barado di tanah urang tu, padohal lah jaleh batang jariang tadi punyo kami, nan mananam batang jariang tu adolah mamak kami nan jaleh-jaleh tau ma batasan tanah punyo kami ma punyo urang lain.
“Oii manga kau ambiak jariang den ko”, sambia tagak mamparatian uni ambo maambiak jariang.
“Ndeh lantang muncuang kau mangecek ko punyo kau mah,” jawek uni ambo.
Mandanga itu, paneh lah urang ko,”Iyo punyo den ko mah, kau caliak lah dima tumbuah e ditanah bagian den mah.”
Uni ambo indak tarimo, diagiah pahamlah dek uni ambo ka urang tu, “oi jan asalai mangecek se muncuang kau tu, caliak lah jaleh-jaleh nan ma latak sapadan e, jaleh iko punyo kami mamak kami yang mananam e.”
Inyo ndak namuah kalah, langsuang dijawek e, “Indak nio tau den do, pokok e iko lah masuak ka bagian tanah kami. Kalau indak picayo bisuak kau den baok mamak den kamari kau baok lo mamak kau kamari bia jaleh dek kau kalau ko lah dibagian kami.”
“Haa jadilah kok baitu nio kau. Jan sampai malu kau bisuak dapan urang rami yo.” Sasudah mangecek baitu, uni ambo langsuang pai maninggaan urang tu nan masih sadang emosi.
Sasuai kesepakatan tadi, hari bisuaknyo lah bakumpua kaduo balah kaluarga sarato jo mamak surang-surang. Mamak urang sabalah lah tagak ditanah bagiannyo, mamak kami lah tagak ditanah kami. Tanah sapadan lah dijalehan dek kaduo balah pihak, dan tabukti kalau batang jariang nan dicakakan ka patang tu ado di bagian tanah kami, mamak urang sabalah nan mangecekan bak kian kalau itu memang adolah hak kami.
Mandanga bak kian, indak tarimolah tetangga tadi nan lah dulu basikareh kalau jariang tadi punyo inyo, nyo berangan mamak nyo dek karano nyo sangko mamak tadi ado dipihak kami. Inyo bisa maatur mamak nyo dek karano nyo maraso lah jadi urang gadang disinan dek karano hiduik nyo salangkah labiah mandapek daripado urang sakitar. Tali nan lah dibantangan mamak tadi dialiah nyo tampek tali tadi, diambiaknyo saketek tanah bagian kami. Kami nan mancaliak tu tantu indak tarimo dek karano hak kami diambiak urang.
Uni ambo partamo angkek suaro, “Oi yo lah balampau bana parangai kau ko mah, lah jaleh-jaleh itu mamak kau nan mamasang tando tu tadi manga kau aliahan pulo.”
Langsuang dijaweknyo kecek uni ambo dek urang ko, ” aniang lah kau, indak batuah bagai ko do. Mamak den ko indak bana ko do, nyo bapihak ka kalian mah, indak nio mandanga kamanakan surang.”
“Haa bapikia lah kau surang, lai berhak kamanakan maatur-atur mamak nyo tu, dek salah mangkoe ndak ado urang nan nio mamihak ka kau. Dek lah maraso labiah saketek pado urang tu sado urang kau pandang sabalah mato.”
Mandanga bak kian, tambah angek lah urang ko, “Aniang kau lah, pokoknyo iko bagian den ndk nio tau den do.”
Mandanga keadaan Indak kondusif lai, maangkek suaro lah mamak urang tu, “Oi alah mah, malu awak dicaliak urang. Iko bateh lah kami agiah, kami latak sasuai jo nan sabananyo. Indak talabiah indak takurang saketek alah nyo. Kini kau kalau indak nio mandanga kecek den, yo tasarah lah lai den lapeh tangan.”
Pado akhirnyo, dibantangan pitunggua jo tali dibateh nan lah ditantuan kaduo balah pihak tadi walaupun pihak sabalah indak tarimo jo keputusan nan ado. Sasudah tali dibantangan, kami jo urang sabalah basuruah ba maaf-maaf an tapi urang sabalah indak nio dek karano hatinyo indak pueh jo kaputusan nan lah dibuek.
Hari samakin balalu nan kami tetap indak saliang manyapo, suatu katiko tibolah hari dimano tajadi lai adu muluik dek karano urang sabalah mancabuik tanaman yang alah ditanam disapadan dek anduang kami dulu. Tanaman nan ditanam ado lado, pisang, tomat, sarato jo jenis sayua lainnyo.
Mancaliak parangai urang tu nan tambah manjadi, naiak pitam pulolah uni ambo, “Oi manga kau cabuik tanaman kami tu, anduang den nan mananam tu mah.”
“Tasarah di den lah, tangan yo tangan den manga kau nan sibuak,” sambia taruih mancabuik tanaman tu.
“Dek itu punyo kami, hak kami, indak patuik kau mancabuik e nan hak urang.”
dek taraso tagaduah, naiak darah Pulo urang ko sambia bakato maninggi, ” oi jan banyak kecek kau lai, tasarah di den lah aa nan ka sanang di den. Iko sadoe bisa den balih mah lai tau dek kau.”
Tagalak uni ambo mandanga tu, “samantang alah labiah salangkah pado urang, maninggi lo gaya kau. Ingek lah, baa iduik kau dulu makan samo panggang bada, lah bantuak kacang lupo kulik kau ko kini mah.”
Mandanga kato bak kian, tambah naiak darahlah urang ko, ” lah pandai muncuang kau kini tu, indak paralu kau sabuik kacang lupo kulik tu do, asa kau tau mandeh kau tu kini se yang samo jo urang nyo mah, biasoe ado anak maninnga se taruih.”
“Elok-elok muncuang kau mangecek, jan tamakan kecek kau bisuak, kau dek kini sadang manganduang jan dek gara-gara muncuang kau anak kau maningga lo bisuak. sasudah bakato itu, batitiak aia mato uni ambo, dek urang tu mambaok-bsok Mandeh kami.
“Tasarah den lah, muncuang yo muncuang den indak paralu lo den kau atur-atur.”
Hari samakin balalu, hinggo lahia anaknyo padusi tapi samanjak lahia anak e sakik sampai-sampai ba infus barawat dirumah sakik. Hari balalu anka nyo indak kunjuang sehat juo, hinggo anknyo indak bisa tatolong maningga dirumah sakik. Indak ado nan tau baa sakik anaknyo hinngo tarangguik nanya anak e, allah hu’alam awak indak buliah baburuak sangko ataupun mamikia nan indak-indak ka urang lain.
Dek muncuang inyo nan mangecek mandeh kami acok kahilangan anak pado saat inyo sadang manganduang pulo, awak bukannyo buruak sangko atau bapikia nan indak-indak tapi satiok kato nan kalua pasti ado sebab jo akibatnyo. Inyo indak bapikia a kato nan kalua dimuluiknyo bisa buek hati urang tasingguang apo indak, ka malukoi urang apo indak, ado dampak e ka diri surang atau ka urang lain atau indak.
Suatu katiko adiaknyo nan pernah adu muluik pakaro bungo dulu alah mulai manyapo kami baliak, jikok basobok dijalan alah disapo nyo, lah pandai main karumah kami liak bantuak dahulu maota samo-samo, kalau ado masalah mangadu ka rumah kami. Mandeh kami indak ado manaruah dandam dek karano inyolah partamo masalah bamulo bantuak kini ko, jikok inyo nio baelok bantuak dahulu kami jo hati sanang manyambuik nyo.
Mancaliak kami lah baelok, kakaknyo tantu indak sanang hati mancaliak adiakyo nan dulu mambuek masalah sahinggo kami indak baelok samo inyo, tapi kini adiak e lari ka ayia dangkek inyo masuak ka lubuak dalam. Inyo maota ka urang lain kalau maraso kesal ka adiaknyo, dek karano nyo masalah manjadi coiko, inyo baelok awak tetap bajauhan.
Wakatu samakin balalu, kami tetap malanjuikan iduik cando biasonyo. Hinggo akhirnyo laki tetangga kami tadi mulai manyapo kami bantuak samulo. Kami indak manaruah dandam ka siapopun walaupun urang tu bana nan buek salah ka kami. Tapi kacuali uni ambo, inyo urang e indak talawan kalau soal adu muluik jo urang, sakali inyo indak suko atau bamasalah jo urang lain, sampai bilo-bilo inyo indak ka nio manyapo urang tu lai walaupun urang tu lahn nio baelok ba maaf-maafan.
Ditambah pulo kalau emang urang tu dulu nan mambuek salah samo kaluarga kami, inyo indak ka bisa baelok jo maafan urang tu apolai urang tu pernah mambaok-baok tentang mandeh kami. Mandeh kami urang nyo pandiam, elok laku, apopun nyo buek dek urang ka bakeh diri e, indak akan pernah dibaleh ataupun ka dilawan kecek urang tu, akhirnyo uni ambolah nan turun tangan malawan urang-urang nan balantiang angan ka mandeh kami.
Awak iyo indak buliah balantiang angan ka urang dek awak lah maraso agak labiah jo agak mandapek pado urang sakitar, tapi cubo dipikia sia urang partamo nan katau jikok tibo badan sakik atau tibo kamalangan kalau indak tetangga jo urang sakitar rumah awak. Awak indak tau a nan ka tajadi ka diri awak, bilo musibah ka datang, sia urang partamo nan ka manolong jikok tajadi malang tubuah dibadan diri.
Alun tantu kaluarga awak yang ka tau partamo kalau awak dapek musibah atau tajadi baa-baa nyo, alun tau urang tu nan ka capek sampai dirumah awak kalau awak sakik atau apolah nan buruak, tetangga jo urang sakitar lah nan ka partamo ka tau baa keadaan awak ditangah masyarakat. Dek awak monolong urang lain kalua masalah, tapi kini baa? Urang lari ka nan dangkek, awak masuak ka lubuak dalam surang.
Mungkin urang alah maafan kasalahan awak, tapi awak indak tau sadalam apo batu tabanam nan awak lempa ka dalam ayia lauik. Walaupun akhirnyo awak samo-samo baelok tapi luko samo kecek nan dikaluannyo indak tau sadalam a luko nan digoresnyo. Urang dilua mungkin bisa galak, tapi luko lamo indak ka pernah sambuah cando samulo katiko awak sadang elok-eloknyo. Banyak urang nan buek salah jo minta maaf sakandak hatinyo sajo.
Inyo indak pernah bapikia sabarapo luko nan dibuek nyo ka urang lain. Awak hiduik badampingan jo urang lain, manusia ko makhluk sosial, indak bisa kalau indak bagantuang ka urang lain, sabarado apopun awak, tapi pasti ado suatu katiko awak ka tagasak ka urang lain, indak bisa hiduik jo harato surang pastilag ka paralu jo urang lain.
Jadi, pasan nan nio disampaikan lewat carito ko, apopun masalahnyo jan sampai awak mangecek nan bisa manyakiti hati urang lain, apo nan kalua dari muluik idaklah bisa awak tarik baliak, sabalun malakuan sasuatu handaklah sakironyo awak pikian dulu baa sebab akibat nan katajadi kadapannyo, jan samantang urang tu diam, bukan bararti urang tu indak sakik hati ataupun manarimo kecek padiah nan kalua dari muluik awak. Bak ibarat peribahasa, “Mulut mu harimau mu”, jikok indak bisa awak mangontrol jo mengkondisikan muluik awak surang, lah ka jaleh muluik awak nan ka manghancuakan diri wak surang. Apolai dek karano tanah sapadan awak jadi indak basapoan, ingek-ingeklah harato indak ka dibaok mati, tapi urang sakitar nan kamanolong awak sampai mati.
Silakan kirim karyamu ke; [email protected]
- BUKA TAHUN 2026, BAND STEVUNK DARI PADANG RILIS DUA LAGU BERNUANSA PROTES! - 23 Januari 2026
- PELESIRAN – Sebuah Catatan: Setelah UWRF, Apalagi yang Kau Cari? | Hasbunallah Haris - 10 Januari 2026
- Resensi: Antara Kota dan Kampung, Pecundang di Negeri Orang, dan Narator yang Berpetuah | Dandri Hendika - 8 Januari 2026
Discussion about this post